走音音樂會

在家舉行走音音樂會，強迫單車先生做我聽眾。

好老師難求! 好想學返小提琴，可惜前兩位老師，一位遠走外國，一位真係教得好冇心機又唔足鐘，自問而家技巧上好有缺憾。學小提琴係好貴的，如果冇好老師，我覺得不如不學，學壞手勢要改仲難。

所以而家，唯有停留在強迫我啲鋼琴學生一路彈琴、我一路用小提琴伴奏來令自己過下癮先。:)

老公生日飯2012

咦？又有人生日，個日期仲係同上年同一日喎。
不過唔同嘅係，今年終於唔駛煩出去邊間餐廳食，終於可以留自己屋企煮，可以玩嘅嘢就更多。 (咁貴租間屋當然要用盡佢)

專門給聖誕用的紅桌布，購自淘寶，RMB$28，仲有花紋 (睇下面啲相就見)，足不出戶有人送來，質地又唔錯，十分抵用，省卻去深水步布市場的時間。
深啡色立體玫瑰花紋的長條形桌布就係皇室堡 MM/H 買到嘅心頭好。

而最玩野的就係.......我件廚師衫，哈哈。

酒係呢支! Wise Choice by 生日主角。

Antipasto:American Sea Urchin with Japanese Tofu (流水豆腐)
竟然在SOGO搵到咁靚的流水豆腐，配海膽真係一流。係又快又方便又好食之選。

Soup of the Day: Green Pea Soup
下次，一定要俾啲耐性隔渣!! 我發誓。

Foie Gras with Apple.
鵝肝係由雪櫃拎出黎之後，外面開始林、裡面仲有少少實咁的情況下落鑊係最好食。可惜今次遲左少少，全件已經變左室溫 (因為得一個人煮...真係顧唔到咁多!)。
蘋果用鵝肝油稍煎，再落少少蜜糖，yum!

POUSSIN (French Spring Chicken)
用牛油同mixed herbs 醃幾個鐘，之後用olive oil 焗左d Garlic (原個) 放入肚。
220C 焗 15 mins，之後 190C 焗 40 mins.

Super Super Super Yum Sea Bass!
Risotto 除左依照一般做法落一般材料，今次加埋浸菇水一齊煮，好食好多。啲菇水濃到好似苦茶咁的顏色，真係好香!
Sea Bass 我發現一定要用智利款先有果種油香，今次唔去CitySuper 雪櫃揀，特登行埋櫃位叫人新鮮切，指定要多啲皮，揀住煎香個皮。不過呢度有少少陰差陽錯，麵粉落多左同埋信錯左其他人的Recipe，皮煎燶左! 呀! 早知駛乜特登去果度買! (好彩冇影響魚肉) 下次一定要再試。

Wagyu Rib Eye Steak from Kobe, Japan
全晚最貴嘅食材...$260/100g，好guilty! 衰在我擺呢個dish 在最後一道，已經飽啦，幾好食都冇咁enjoy。To be fair，係好好食，入口即溶。但當然香味係差少少嘅，生日果個就係咁講。

最後係自製生日蛋糕。
海綿蛋糕 + sugar icing，再加埋果啲好白痴的蠟燭 --- 我返到黎先知佢地係冇得點著火! 該死的聖X娜。

豐富晚餐又完結，鍾意煮野的話，真係過足癮，樣樣都係自己同主角最鍾意食，不過要諗下一年生日煮something else，就有d頭痕....
不過最開心都係食食下，有人突然陰啲陰啲自言自語：「哎呀我係全宇宙最幸福嘅男人」，咁呢餐幾辛苦都煮得抵嘅。
(唔駛洗碗其實都係好幸福的了.........)

Solo牌 2013年坐枱月曆

終於拎咗貨，一個月冇覺好訓嘅心血印好 ---- 2013年坐枱月曆。

今次憑藉月曆「把愛拉闊」（Terry改嘅），向先父致敬同致謝（多謝老豆你出錢！）。另外多謝幫忙印刷嘅Arion。有出月曆嘅念頭，最大原因一來想藉佢紀念先父，其次二來想將愛拉闊，三來剩餘嘅少量數目希望需要插畫師幫手嘅各單位唔好客氣拎返個黎參考下。

先父遺下嘅零用錢，其中一部份我覺得咁用，好有意義，比我全數儲起佢投資更有意義。

入面12個月既作品，有手彩繪本亦有電腦繪圖，其中一個月亦有小妹得獎嘅插畫作品，有3-4個月係以前畫開嘅，另外月份就係今次為籌備月曆先著手畫。今年總算對得住自己，可以出到一本所謂精選作品集 (2014年再出嘅話就冇貨要由頭畫過喇!)